Mi feel a weh tideh. Mi nuh know wha trouble me suh but it come like mi cyaan res mi mine. Mi granny did always ask mi wha mek mi so haunted. (Mi neva have nuh repsonse edda caw mi nuh really know). She seh mi always a bunks bout like mi nuh ave nuh home. Cyaan res miself noweh. Truth she a tawk because all now mi tink bout move- AGAIN. And mi fus come yah when? January? Mi miserable yuh si? Cha! Mi cyan fine noweh mi like. One deh mi here, nex mi ova dere. Fram yu tun yu head mi deh pon road again. What a life… Restlessness is a trouble. And yu know wha? I fah one is tiad a de aggravation. Sometimes mi tink Granny speak di trut when she tell mi seh mi too craven. Mi nuh know… But mi fi tap di foolishness an mek up mi mine. Midwest, East Coast, South Florida. Cyaan have di man falla mi fram one place to di nex. So, Miss Sweetie [a mi name so] wha yuh gwine do? Mek up yu mine and sekkle yuhself lady. Tap di foolishness, cha!
*This post brought to you by Jamaica, West Indies and the grandmother who taught me the best way to express frustration and tribulation is through the use of Jamaica patwa. Tanks!